We never give up easily

Дали го знаете она чуство кога заради нечии туѓи дела, заради нечие туѓо однесување чуствувате вина, своја лична вина или одговорност на некој начин. Дали некогаш  имате почуствувано срам од однесувањето на други, и заради нивното однесување ви се гади, буквално ви се превртува во стомакот. Е, така јас се чуствувам последниве година-две, а посебно последниве 6-7 месеци колку минаа од последните парламентарни избори.

Разочараност, тага, мачнина…од време на време и револт и бес ме обземаат кога гледам што се случува на социјалните мрежи и на интернет општо и по медиумите. Јадно и жално е како нашиот сајбер и медиумски простор се полни со омраза и отворена нетрпеливост помеѓу Македонците. Неверојатно е колку многу е закрвен нашиот народ. Каков ли зол дух влегол во луѓето  па толку да се мразат? Што ги тера луѓето толку одвратно и душмански да се расправаат  меѓу себе.  Зошто браќа и сестри по род, по ген и по национален идентитет  да не можат да разговараат нормално, туку мора да се плукаат едни други и само да гледаат повеќе да се навредат меѓусебе.  А порано, во минатото не беше вака. Знам, сведок сум на политичкиот и јавниот живот од почетокот, од осамостојувањето на Македонија. Што се случува со нас деновиве? До каде ќе не доведе ова лудило? Зошто се ова му се случува на македонскиот народ? Веројатно растот и развојот, и се помасовното користење на социјалните мрежи и онлајн медиуми  кај нас доведоа до ваква ситуација. Можеби. А политиката???

Да, одвратната, себичната , безобѕирната , најниската страст и глад по власт преточена во политика бесрамно го раздира и го уништува македонското национално ткиво. Македонецот на Македонецот  му е непријател заради ниските политички страсти. Заради настрвените по власт душмани на сопствениот народ и нивната лакомост по позиции, привилегии и лична финансиска и имотна корист, браќата Македонци се мразат меѓу себе.

Многу е жално и мачно кога гледам колку сме поделени и колку се мразиме заради политика. Како да е малку што нашите надворешни душмани не не оставаат на мир, како да е малку што некои од соседите не негираат како народ и сакаат да не снема, туку мораме и помеѓу себе да се караме и да гледаме да си наштетиме. Зарем некому, кој е Македонец може да му пречи кога некој друг Македонец сака да се радува на победа на својот национален тим? Дури и притоа да е облечен во националните бои и на главата да има шлем на МАКЕДОНСКАТА Фаланга. Зошто ова би пречело некому? Сите ние сме Македонци, и не ја оправдувам поделбата на Антички и Славо Македонци. Едноставно, такво нешто не постои никаде освен во главите на политичарите. Политичари кои во безмилосната борба за власт би ја продале и сопствената мајка и сопствените деца, а за Македонија и Македонците да не зборуваме.

Во услови кога Македонската нација е негирана и постоењето на Македонија како држава е постојано оспорувано, најмалку ни требаат поделби помеѓу народот заради ситни политички поени. Едноставно, јавноста треба да ги препознае и да ги отфрли сите обиди на ситните души да направат раздор помеѓу нас. Зарем е можно некој заради лични интереси и дневна политика да сака да направи Македонецот на Македонецот да му е непријател, да се раскараат браќата до толку да се мразат и да сакаат да си наштетат еден на друг. Луѓето во помалите градови се познаваат и знаат кој е за која политичка опција. Соседи и роднини заради тоа не разговараат, или кога разговараат се расправаат, се закрвуваат меѓу себе. Па може ли некому партијата и лидерот да му се поважни од Македонија, од татковината.

Политичарите, нивните послушници и полтрончиња, ситните души кои се гребат за привилегии, тендерчиња или позиции прават се за да ја прикажат другата страна како да е самиот црн ѓавол. И што е нај трагично, најчесто за оваа цел се користат националните чуства и Македонската национална свест. Успеаа да го поделат народот на Антички и Славо Македонци, соросоиди и македоноиди, неписмени и интелектуалци, на бугарофили и србомани, грчки платеници и албански слуги и што уште не.  Едните се обидуваат да ја прикажат државата во најлошо светло и дури и апсење за криминал на сопственик  на медиум во светот го прикажуваат за насилно затворање на медиумите во Македонија. Другите пак ги хранат медиумите буквално, им обезбедуваат комотна егзистенција со своите кампањи и со тоа ги прават зависни од парите од своите проекти. И во двата случаја државата и народот се оштетени. Но политичките партии си ја тераат агендата. Тие ќе одат до крај, само за да добијат власт, макар тоа значело дека  може да се случи да немаат со што да владеат.

Се закрвија Макдонците и заради кошарката, заради спомениците, заради ракометот. Едните се патриоти, другите се предавници и ги исмеваат првите. Партиите само дотураат масло на огнот, а сите ние дуваме во него, го распалуваме. Едните се радуваат што имало мизерија во Македонија, иако тие се најзаслужни за истата, а другите велат нема мизерија, луѓето не се невработени, работат во сива економија. Па зошто ја толерирате сивата економија? Едните ги исмеваат и напаѓаат спомениците кои се градат, не биле естетски убави и не ја отсликувале нашата историја, а забораваат дека кога тие беа на власт можеа да направат и поубави и по соодветни споменици на историјата, но тогаш им беа поважни фабриките и како да си ги присвојат истите, а работниците да ги остават на улица. Другите градат и не прашуваат, а кога ќе прашаат, нема позитивен одговор. За вкусови не се расправа, но би можело да се консултира пошироката јавност, како на пример со гласањето за фасадата на зградата на Владата.

И спортот успеаа да го искористат за кавги и поделби. Едните биле премногу патриоти, другите не биле патриоти воопшто. Едните ги присвојувале успесите на спортистите, а другите го исмевале народот кога се радува на успесите на нацијата. Па кога можеше на секој меч да има по 5-6000 Македонци на мечевите на нашата репрезентација, кога можеше Рикер да оди во Ниш и да навива за Македонија, а Претседателот Иванов во Белград и искрено да навива и да се радува, зошто лидерот на опозицијата не отиде? Дали некој му забрани? Наместо тоа, неговиот заменик ја нападна, ја навреди и се се испокара со целата јавност која била многу патриотски настроена и не требало да се радува на победите на својот тим. До каде ќе одиме вака, и за музика , се испокаравме, и за филм се испокаравме. За економија и за пари исто така. До кога вака? Додека не почнеме кавгите од сајбер просторот и медиумите да ги префрламе во живо. Додека не почнеме меѓу себе и на улица да се пресметуваме. Престанете  додека е време. Доста беше.

п.с. Да се вратам на почетокот и на срамот и на личната одговорност која ја чуствувам заради однесувањето на моите браќа и сестри. Токму заради тоа што моите сонародници, моите Македонци се однесуваат безумно јас се чуствувам засрамен и одговорен. Затоа што се работи за мојот народ, за мојата нација, токму затоа и јадот и срамот се поголеми. Имам една порака до сите. Не е директно од мене, ја пронајдов на интернет, на еден Србски портал каде имаше доста препукувања и кавги на национална основа. Пораката е од девојка потпишана како Мила. Не ја познавам само сакам да и честитам на ова, и да додадам дека и јас се придружувам на пораката. Се надевам не и пречи што ја позајмив. Во оргинал е на Англиски, и така поширок круг луѓе и надвор од Македонија ќе ја разбере.

I AM MACEDONIAN! LIKE IT OR NOT…

For all of u with “smart” questions: NO it’s not in GREECE!!! YES we do have cars!!! YES we do have TV!!! NO we don’t speak English there!!! YES we have OUR OWN language and the most perfect letter in the world!!! YES we can drink a lot, and not to be drunk!!! And YES our RAKIJA tastes better than OUZO!!! YES, we are proud and brave, and NO, we NEVER GIVE UP easily! So love us or hate us, but you cannot be indifferent! YES we do have our own president!!! NO, Europe is not a country!!! NO we don’t have states!!! YES we do have McDonald we just choose not to eat it 5 times a day!!! YES all of us are gorgeous!!!YES we do look good every day!!! YES we do expect a man to be a gentleman!!! YES our accent is hot!!! NO we are not playing hard to get we ARE hard to get and even harder to keep!!! NO we don’t drink from plastic cups in clubs!!! YES we celebrate Christmas!!! YES we know everything!!! YES we speek 5 languages!!! We came here because we waned, YES when we want something we get it!…and YES u heard right MACEDONIA is paradise on earth!